Lääʹmes oummi vuõiggâdvuõđi saǥstõõllâmkåʹdd

Lääʹmes oummi vuõiggâdvuõđi saǥstõõllâmkåʹdd lij ÕM lääʹmes oummi vuõiggâdvuõđid kuõskki õõlmâs-suåppmõõžž meâldlaž riikklaž koordinaatioriâšldõk. Tõn tuâjjan lij hiâlpted õõlmâs-suåppmõõžž meersaž tiuʹddepiijjmõõžž.

Saǥstõõllâmkåʹdd tuåimmai sosiaal- da tiõrvâsvuõttministeria õhttvuõđâst. Tõn tuâjaid šiõtteet asetõõzzin, koon mieʹldd tõn tuâjjan lij

  • õõuʹdeed da suåvted õʹhtte õõlmâs-suåppmõõžž meersaž tiuʹddepiijjmõõžž da lääʹmes oummi vuõiggâdvuõđi lokku välddmõõžž puki vaaldâšmvuuʹdi tuåimmjummšest
  • raajjâd tuåimmpâjjses tuåimmprogramm, koʹst meäʹrtõõlât õõlmâs-suåppmõõžž tiuʹddepiijjmõõžž õõuʹdeem kõskksaž täävtõõzzid, tõid õõuʹdeei neävvaid di taarbšum vuåppmõõžž
  • nõõmeed kõskkvuõđstes lääʹmes oummid eʹtǩǩeei vuässõõtti ÕM õõlmâs-suåppmõõžž 33 artikla meâldlaž õhttvuõttbeäʹl tuåimmjummša.

Saǥstõõllâmkåʹdd šâdd ministeriai, lääʹmes oummi da sij ruåđees, tuâjjmarkkânorganisaatioi, kooʹddi da mäddkooʹddi di tuʹtǩǩummuž eʹtǩǩeeʹjin. Saǥstõõllâmkååʹddest lie saaǥǥjååʹđteei da vääʹrrsaaǥǥjååʹđteei õõl jäänmõssân 16 vuäzzliʹžžed. Saǥstõõllâmkååʹddest lij väʹlddpiisar da plaaneei. Riikksuåvtõs šiõttad saǥstõõllâmkååʹdd neellj eeǥǥas vuârstes.

ÕM lääʹmes oummi vuõiggâdvuõđid kuõskki õõlmâs-suåppmõš da tõn vaʹlljeemnallsaž påʹrddǩeʹrjj pueʹtte Lääʹddjânnmest viõʹǩǩe 10.6.2016. Viõʹǩǩepueʹttem mieʹldd väʹlddkååddlaž lääʹmes oummi suåvtõõzz sâjja vuâđđeeš lääʹmes oummi vuõiggâdvuõđi saǥstõõllâmkååʹdd. Tõt tuåimmai õõlmâs-suåppmõõžž 33 artikla meâldlaž koordinaatioriâšldõkkân.